رايحة بينا لفين يا مصر
وليه راسك منحنية
مش انتي قالوا عنك ولادك
مصر الدولة الأبية
ولاخلاص داسوا عليكي
وخلوكي بقيتي ضحية
وخلوا اسمك في التراب
ومبقيتيش دولة قوية
وليه شبابك مقتولين
على يد البلطجية
راحت فين الكرامة
والشرف والانسانية
راحت فين الحضارة
اللي من الآف السنين
اللي ابهرت شعوب
وحيرت مهندسين
ليه ولادك ضد بعض
وليه بيقنا متفرقين
فين نلاقي زي مينا
عشان يوحد القطرين
مش مهم في اي حزب
او في طائفة ودين
ما طول حياتنا بنحب بعض
وُكنا دايما طيبين
ليه دماء القبطي
سايلة ع التراب
ليه بيوتهم يحرقوها
ويجعلوها في الخراب
وكل ما يشوفوا مسيحي
يتمنوا له السراب
دا المسيحي ليه إله
يقدر يعمل انقلاب
قادر ينصف العجوز
والصغير والشباب
قد ايه حزين عليكي
وف قلبي ليكي عتاب
لحد امتى الجرح ينزف
والدموع ع العيون
والمسيحي حقه ضايع
مكتوبة عليه الديون
ولو في يوم طالب بحقه
بنلاقيه في السجون
لكن لينا رب عادل
مــڼ اجله الجراح تهون
قادر ينقذ البرئ
حتى لو وسط الآتون
دا اللي بارك شعب مصر
دوناً عن بلاد الكون
إرجعي مصر العظيمة
ورجعي الحق اللي ضاع
والبرئ خليه يعيش
وابعديه عن الصراع
ارجعي وداوي جروحك
وانهضي وشِدي الشراع
قاضي كل اللي فناكي
واللي كَسَر واللي باع
فيضي في قلوبنا الامان
واجعلي ع الليل شعاع
ارفعي راسك لفوق
كالجبار والشجاع
ارفعي راسك يا مصر
واثبتي لكل البشر
ان كل عدو حاول
يهزمك راح ينكسر
واسم مصر يفضل لفوق
وهو اللي هينتصر
وخلي شعبك يرفع اسمك
وبحضارتك يفتخر
وتبقي مصر اللي التاريخ
مش لاقي لحبك حصر
وكل اولادك فداكي
وتعيشي انتي يا مصر
+++ بقلم : وائل ميخائيل +++